Ракометниот клуб Вардар постигна договор со српскиот репрезентативен голман Милан Бомаштар (26), кој од следната сезона ќе го засили „црвено-црниот“ состав. Соработката ќе започне од сезоната 2026/27 и ќе трае во наредните две години.
Бомаштар пристигнува во Скопје како дел од стратегијата на клубот за дополнително засилување на голманската линија и зголемување на конкуренцијата во тимот, како за домашните, така и за европските предизвици.
Станува збор за голман со богато меѓународно искуство. Во моментов настапува за францускиот Шартр, а во својата кариера има брането и во Шведска за тимот на Шевде, како и во Шпанија за Адемар Леон.
Новиот чувар на мрежата не го криеше задоволството од трансферот во редовите на Вардар, потенцирајќи ја важноста на соработката со тренерот на голмани Марио Келентриќ, како и атмосферата во салата „Јане Сандански“.
„Вардар е еден од најдобрите клубови на Балканот и многу сум среќен што ќе бидам дел од таков клуб. Мислам дека ова е чекор повеќе во мојата кариера и дека многу ќе ми значи соработката со Марио Келентриќ, кој е еден од најдобрите тренери на голмани. Со нетрпение ја очекувам можноста да го бранам голот пред фантастичните навивачи на Вардар во салата „Јане Сандански“, познати како едни од најдобрите во Европа. Македонската лига во последните неколку години израсна во една од најјаките лиги на Балканот. Верувам дека со Вардар ќе ги освоиме сите домашни трофеи и дека во Европа ќе се покажеме во најдобро можно светло, изјави Бомаштар.
Со овој потег Вардар уште еднаш потврдува дека има високи амбиции и сериозни планови за иднината, како на домашната сцена, така и на европската ракометна мапа
