Годинешната завршница од Купот на ОФМ во женска конкуренција ќе ја сочинува бранителот на титулата Наковски Волеј и три екипи кои за првпат ќе настапат на финалниот турнир – Вардар ЕМ, Младост УГД и Газели Волеј.
Екипата на Газели Волеј, која оваа сезона е новајлија во прволигашкото друштво, беше последниот тим што обезбеди пласман на завршниот турнир. Во четвртфиналниот дуел одигран во Скопје, „газелите“ пред својата публика славеа убедлива победа од 3:0 во сетови (25:16, 25:20, 25:13) против составот на Пелистер Волеј.
Иако се очекуваше поизедначен натпревар, домашниот тим одигра сигурно и дисциплинирано во текот на целиот меч и заслужено стигна до победата. Од друга страна, гостинките од Битола не успеаја да го покажат својот препознатлив квалитет и беа далеку од своето најдобро издание.
Со овој триумф, Газели Волеј им се приклучи на Наковски Волеј, Вардар ЕМ и Младост УГД, кои уште претходно го обезбедија своето место меѓу четирите најдобри екипи во Купот.
