Младите македонски тенисери до 14 години изминатиот период настапија на развојните шампионати во Анталија, Турција. По одигрувањето на првиот турнир, вториот беше прекинат само еден ден по неговото започнување поради безбедносни причини и случувањата во Блискиот Исток. Освен овој турнир, беа прекинати и сите натпреварувања кои во тој период се одржуваа во организација на ИТФ, како во сениорска, така и во јуниорска конкуренција.
На првиот турнир забележителен настап имаше Андреј Темов, кој стигна до полуфинале и во сингл и во конкуренција на двојки. Победник на турнирот беше Арас Јалчинкаја од Турција, кој токму во дуелот со Темов најтешко дојде до триумф.
Покрај Темов, на шампионатот настапија и Василиј Закоски кај момчињата, како и Деа Крстевска и Ведрана Таневска кај девојчињата. Тие беа дел од групата од 40 млади тенисери и тенисерки од вкупно 10 држави. Покрај натпреварите, учесниците имаа можност и за дружење и размена на искуства.
За време на престојот во Анталија, тренерите работеа во повеќе групи со различни натпреварувачи, при што младите тенисери имаа можност да научат повеќе за тениската игра, како и за подготовките потребни за настап на турнир. Дел од учесниците имаа можност да се запознаат и со украинската тенисерка Катарина Заватска, која во истиот период настапуваше на ВТА 125 турнирот во Анталија.
