Борбата за најдобар стрелец во Втората македонска фудбалска лига станува се поинтересна како што сезоната влегува во завршната фаза.
Во моментов на врвот на листата се наоѓаат Иван Глигоров од Охрид и Виктор Ангелов од Скопје, кои имаат по 13 постигнати погодоци во сезоната 2025/2026.
Напаѓачот на Охрид денес има одлична можност да се одлепи на врвот. „Рибарите“ на домашен терен ја пречекуваат Победа, во натпревар во кој охриѓани важат за апсолутни фаворити.
Токму ваквите натпревари се добра прилика за искусниот голгетер да ја зголеми својата голгетерска сметка и да стане осамен лидер на листата на стрелци во второлигашкото друштво.
Останува да се види дали стручниот штаб на Охрид ќе му даде целосна минутажа на Глигоров или ќе одлучи да го поштеди во финишот од натпреварот, со оглед на тоа што тимот го очекуваат и потешки предизвици во борбата за пласман во Првата лига.
