Во Кочани денеска се одржа редовен семинар за судиите и контролорите од Третата македонска фудбалска лига – Исток, со цел дополнително унапредување на нивната подготвеност и запознавање со најновите измени во фудбалските правила.
Активностите започнаа на Градскиот стадион во Кочани, каде што судиите ги полагаа физичките норми (фитнес тест). Сите присутни судии успешно ги исполнија зададените стандарди и ја потврдија својата физичка подготвеност за продолжението на натпреварувачката сезона.
По завршувањето на тестирањето, беше одржан и едукативен дел, на кој судиите и контролорите имаа предавање поврзано со најновите измени и толкувања на фудбалските правила. Предавач беше Дејан Јакимовски, член на Судискиот одбор при Фудбалската федерација на Македонија и ВАР менаџер.
Со ваквите активности уште еднаш се потврдува заложбата на Фудбалската федерација на Македонија за континуирана едукација и професионален развој на судискиот кадар, што е од особено значење за подобрување на квалитетот на натпреварите во домашните лиги.
