Ракометарите на Охрид остварија убедлива победа над Тиквеш со 42-25 и направија голем чекор кон пласман на завршниот турнир во Купот на Македонија.
Домашниот тим одигра одличен натпревар пред својата публика и уште на самиот почеток ја презеде контролата. Охрид отвори фуриозно со серија од 6-0 во првите минути, со што јасно најави дека ќе доминира на средбата. Предноста постојано растеше, па до крајот на првото полувреме „гладијаторите“ веќе имаа убедливи 23-12.
Во второто полувреме разликата дополнително се зголемуваше, а гостите од Кавадарци не успеаја да најдат решение за расположениот домаќин. Охрид рутински ја одржуваше предноста и на крајот славеше со високи 42-25.
Најефикасен во победничкиот состав беше Џанфранко Прибетиќ со девет погодоци, додека Стефан Петриќ постигна седум. Кај Тиквеш најпрецизен беше Димитар Коцев со пет гола.
Вториот полуфинален дуел од групата ќе се одигра во недела, кога силите ќе ги одмерат Куманово и Младост, по што ќе биде познат и противникот на Охрид во борбата за пласман на Ф4 турнирот.
