Поранешниот селектор на Израел и тренерот со кој Челзи во 2008 година играше финале во Лигата на шампионите, Аврам Грант денес ги посети девојките на ЖФК Тиверија Брера во Струмица.
Израелскиот стратег е во посета на Струмица, вчера го следеше мечот меѓу Брера и Струга Трим Лум, меч од 21. коло на Прва лига, а денес беше во посета на женскиот фудбалски клуб Брера Струмица.
„Звучното тренерско име и некогашен тренер на Челзи АВРАМ ГРАНТ беше на дводневна посета на нашиот клуб. Покрај следење на натпревари од ПМФЛ и Прва Супер лига, денес Аврам Грант ги посети нашите најмлади фудбалерки родени 2017-2019 давајќи им поддршка и мотив да продолжат да се движат по патот на фудбалот. За нашиот клуб оваа посета е навистина важна бидејќи станува збор за тренер од Светски рамки а пред се многу добар човек“, велат од ЖФК Тиверија Брера.
Легендарниот израелски стручњак доби и дрес од ЖФК Тиверија Брера, кој му го врачи директорката на клубот, Александра Терзиски, која е поранешна професионална фудбалерка и репрезентативец на Македонија.
Инаку, Аврам Грант е советник во Јуве Стабија, клуб кој ги има истите сопственици со струмичкиот прволигаш.
