Женската ракометна репрезентација на Македонија се враќа од гостувањето кај Белгија со горчлив пораз од 26-25 во третото коло од квалификациите за Европското првенство 2026. Избраничките на Кристијан Грчевски имаа контрола во најголемиот дел од натпреварот, но падот во клучните моменти ги остави без први бодови во групата.
Македонките отворија сигурно и со цврста одбрана и трпелив напад неколкупати создадоа предност од три гола разлика. Во првото полувреме одржуваа ритам и диктираа темпо, но домаќинките успеаја да намалат пред паузата и на одмор се замина со минимална разлика.
Во вториот дел Македонија повторно ја презеде иницијативата. Со неколку одлични интервенции на голманката Илиќ и голови од контранапад, нашата селекција стигна и до највисоки „плус четири“ (18-14). Токму во тие моменти се чинеше дека натпреварот оди во посакувана насока, но следуваше неколкуминутен празен од во нападот што Белгијките го искористија со серија од четири погодоци за израмнување.
До самиот финиш се играше гол за гол. На пет минути пред крајот резултатот беше изедначен, а домаќинките првпат поведоа дури во 56. минута. Македонија возврати преку крилната позиција за ново реми, но во последните две минути Белгија повторно дојде до минимална предност. Во завршниот напад нашите ракометарки не успеаја да го реализираат последниот шут и бодовите останаа во Хаселт.
Најефикасна во македонскиот табор беше Јована Кипријановска со седум гола, додека сестрите Јанкуловски и Ивана Гакидова дадоа значаен придонес. Сепак, одбраната немаше решение за расположената Муниа Смитс, која постигна 11 погодоци за белгискиот состав.
Со третиот пораз во квалификациите, Македонија останува без бод и ќе мора да бара реванш на домашен терен во следниот меѓусебен дуел, каде победа ќе биде императив за да се задржат шансите за пласман на континенталниот шампионат.
