Младиот бек Марин Петков повторно е дел од сениорскиот национален тим на Македонија, откако претходно повреда на слабините го спречи да игра во финалните „12“ во претквалификациите за Светскиот куп 2027 година.
По закрепнувањето и одличните партии во дресот на МЗТ Скопје Аеродром, Петков деновиве учествува на тренинзите со националниот тим пред почетокот на февруарскиот ФИБА „прозорец“. Македонија ќе одигра два натпревари од групата „А“ во претквалификациите за Евробаскетот 2029 година, а првиот од нив е закажан за петок во 18:00 часот против Луксембург, во целосно реновираната сала во „Градски парк“ во Скопје.
„Нормално, очекуваме да победиме. Знаеме дека Луксембург е добра репрезентација, како и ние, и имаат две победи во првиот круг. Победата е доста важна, можам да кажам дека би била и најважната во овие два меча кои следуваат“, вели Петков, кој додава дека тимот полека се прилагодува на барањата на новиот селектор Жозеп Мариа Берокал и неговите соработници.
„Интересно е на тренинзите. Системот е сличен, но и различен. Во овие два-три дена поставивме планови за играта во одбрана и напад. Мислам дека на секоја репрезентација би ѝ одговарал шпанскиот стил на игра. Сите знаеме дека Шпанија е една од најдобрите кошаркарски земји, заедно со САД и Србија. Стилот сигурно ќе изгледа добро, а ние одиме на победа“, додава младиот репрезентативец.
