Второлигашот Шкендија Арачиново испиша историја откако успеа да обезбеди пласман во полуфиналето од Купот на Македонија откако со 3:1 го совлада прволигашот Работнички.
Тимот од Арачиново кој го води искусниот стратег Љупчо Марковски – Калц уште еднаш ги исфрла „романтичарите“ од Купот, откако минатата сезона уште во првото коло од Купот беше исфрлен Работнички, а тогаш Шкендија беше третолигаш.
Натпреварот се играше во Куманово на стадионот на Башкими, бидејќи „Хасанбег арената“ нема ВАР технологија.
Резултатот го отвори Десниќ во 40. минута за водство на тимот од Арачиново со 1:0 на полувреме. Во вториот дел Никола Пејовиќ заработи црвен картон со што Работнички од 58. минута беше со играч помалку, а две минути подоцна Николче Шаркоски погоди за 2:0.
Во 64. минута Бесир Демири успеа да го намали водството на Шкендија Арачиново на 2:1, но немаше сили за ништо повеќе тимот од Дебар Маало, откако Зани Назифи во 85. минута погоди за 3:1.
Шкендија Арачиново е првиот полуфиналист во Купот на Македонија.
