По завршувањето на регуларниот дел од сезоната, во просториите на Ракометна федерација на Македонија беа извлечени броевите за плеј-оф фазата во машката Суперлига. Битката за титулата и местата што водат во Европа започнува на 28. Февруари, а уште првото коло носи сериозни возбудувања и дерби-пресметки.
Според бергеровиот систем, сезоната ќе кулминира со неколку големи дербија, а најголемото – меѓу Вардар 1961 и Еурофарм Пелистер – е закажано за второто и шестото коло.
Но, и самиот старт носи жестоки дуели:
- Тиквеш – Еурофарм Пелистер
- Бутел Скопје – ГРК Охрид
- Алкалоид – Вардар 1961
Вардар ќе гостува во Автокоманда кај Алкалоид, во дуел кој веднаш ќе покаже во каква форма влегуваат „црвено-црните“ во завршницата од сезоната. Актуелниот шампион Еурофарм Пелистер, пак, ќе има незгодно гостување во Кавадарци против мотивираниот Тиквеш.
Освен двомечот меѓу првакот и вицепрвакот, неизвесност се очекува и во пресметките со Охрид и Бутел, па речиси секое коло ќе носи барем по едно дерби. Конкуренцијата е изедначена, а бодовите од самиот старт може да се покажат како клучни во трката за титулата. Новата шампионска екипа ќе биде крунисана на 31 Мај.
Плеј-офот ветува драматична и неизвесна завршница на сезоната. Нема простор за кикс – секој бод ќе тежи двојно, а првото коло веќе го поставува тонот: дерби атмосфера уште од самиот старт.
