Словенечкиот репрезентативец Нејц Цехте повторно се поврзува со трансфер во Македонија. Според информациите на специјализираниот ракометен портал „Handballia“, искусниот десен бек би можел да ја продолжи кариерата во редовите на Алкалоид.
Како што наведува словенечкиот медиум, во македонските ракометни кругови се шпекулира дека Алкалоид бара засилување во бековската линија – ракометар со искуство и силен шут, а Цехте се вклопува во тој профил. Наводно веќе постоел и иницијален контакт меѓу двете страни, но засега нема официјална потврда.
Цехте има 33 години и оваа сезона настапува за германскиот бундеслигаш Фуксе Берлин, каде што пристигна како замена за повредениот Фабијан Виде. Неговиот договор истекува летово, што дополнително ги засилува шпекулациите за можно заминување.
За македонската јавност тој не е непознато име. Во сезоната 2023 пристигна од данскиот ГОГ Гудме во Еурофарм Пелистер, но соработката со битолскиот клуб заврши порано од очекуваното. Во текот на кариерата настапувал и за Хановер-Бургдорф, Горење Велење и Кршко.
Инаку, поради семејни причини Цехте не настапи на последното Европско првенство кое се одржа во Данска, Норвешка и Шведска.
Во наредниот период се очекува појасна слика околу неговата иднина и дали Алкалоид навистина ќе успее да го донесе словенечкиот шутер во своите редови.
