ГРК Охрид продолжува да ја живее својата европска приказна од соништата. Со две убедливи победи над Дукла Прага (30-21 и 30-24), охриѓани изборија место меѓу осумте најдобри во ЕХФ Европскиот куп – најголем клупски успех на меѓународната сцена.
Тимот на Борис Ројевиќ во Прага покажа зрелост и карактер, не дозволувајќи драматичен пресврт и рутински го потврди пласманот. Со вкупна предност од +15, „гладијаторите“ испратија силна порака дека не случајно се во ова друштво.
Без фаворити – секој против секого
Во четвртфиналето повеќе нема повластени позиции и нема носители – секој може да се падне со секого. Охрид ќе има седум можни противници, а конкуренцијата е сериозна и разновидна, од искусни европски клубови до амбициозни проекти со големи буџети.
Ако се бара „поповолна“ ждрепка на хартија, тоа би биле тимовите на Извиѓач Љубушки, Бурса Нилуфер или Бањик Карвина – екипи против кои Охрид би можел рамноправно да се надигрува и да се надева на полуфинале.
Сепак, предизвиците не изостануваат. Потешка задача би значеле дуели со Олимпијакос, Бузау или Целје – клубови со искуство и европска традиција.
Можеби најголем предизвик би бил евентуален дуел со Татабања, тим кој располага со сериозен буџет и важи за еден од главните фаворити во ова натпреварување.
Европа како потврда на растот
Пласманот во ТОП 8 не е само резултат, туку и потврда за континуитетот и развојот на клубот. Охрид сезонава игра на три фронта, а европската приказна доаѓа како круна на амбициозниот проект што постепено се гради.
Ждрепката за четвртфиналните двојки ќе се одржи во Виена во вторник од 11:00 часот, а натпреварите од оваа фаза се закажани за 28/29 март и 4/5 април.
Европската авантура продолжува – а по елиминацијата на Дукла со две сигурни победи, „гладијаторите“ веќе покажаа дека имаат капацитет да се носат со секој ривал. Во оваа фаза нема лесни противници, но има и еден тим од Охрид, кој верува во себе и не се плаши од големите имиња.
