Вечерва со мега-дербито во Куманово меѓу шампионот Форца и непоразениот лидер Проект, стартува пролетниот дел во Првата футсал лига на Македонија.
Ова ќе биде меч кој можеби и ќе го даде одговорот на тоа дали Проект веќе ќе оди кон прослава на шампионската титула, со оглед на тоа што има шест бодови повеќе, при евентуален триумф би имал девет бодови предност и веќе многу работи ќе бидат решени.
За Форца ова ќе биде меч да се биде или не, бидејќи од оваа дерби зависи дали шампионот од Куманово ќе ја одбрани титулата, а Проект влегува можеби со помал товар на себе бидејќи притисокот ќе биде кај Форца.
Проект на вечерашниот меч влегува со 27 бодови на своето конто, во однос на Форца која има 21 бод и се наоѓа на второто место. Првото нивно соочување во Гевгелија заврши со убедлива победа за Проект кој со 6:1 во целост ја надигра Форца.
Прв судија на вечерашниот меч кој ќе решава за титула ќе биде Тоше Ицев од Кавадарци, Боби Величков од Велес е втор судија, а трет судија е Роберт Црвенов од Велес.
Делегат на средбата која започнува во 20:30 часот е Кирче Костов од Свети Николе, а пак Петар Мантев од Неготино е контролор.
Во однос на останатите натпревари, во сабота Јувентус Серава ќе го пречека Мал Ајакс од Штип, в недела Кеги Моби ќе биде домаќин на Балкан, додека колото се затвара дури во понеделник со два мечеви. Во Крива Паланка екипата на Осогово ќе игра со Шкупи, а пак Бутел ќе игра со Клими.
