Екипата на Македонија Ѓорче Петров со убедлива победа од 3-0 над Шкупи стави крај на резултатската криза и ја запиша првата пролетна радост во Првата македонска фудбалска лига.
„Лавовите“ од самиот старт покажаа дека трите бода остануваат во Ѓорче Петров. Веќе во 10. минута Хамзиќ најдобро се снајде во шеснаесетникот и го отвори резултатот, најавувајќи сигурно попладне за домашниот состав.
Само неколку минути подоцна следуваше уште поубав момент. Гереро повлече контранапад и со прецизен лоб удар го зголеми водството на 2-0. Точката на првото полувреме ја стави младиот Софијаноски, кој во 29. минута со силен удар од дистанца постигна вистински еврогол за 3-0.
Во продолжението темпото очекувано опадна. Македонија ЃП рутински ја контролираше играта, имаше и поништен погодок поради офсајд, но резултатот остана непроменет.
Ова е прв триумф за тренерот Боби Божиновски на клупата на ѓорчепетровци и значајни бодови во битката за опстанок, додека Шкупи останува во последната позиција на табелата.
