По европската победа над Дукла Прага и чекорот кон четвртфинале, ракометарите на ГРК Охрид, се враќаат на домашните обврски.
Во рамки на 21. коло од Супер лигата, охриѓани во вторник во „Билјанини Извори“ го пречекуваат составот на РК Бутел Скопје, во меч кој доаѓа меѓу двата европски предизвици против Дукла.
И покрај густиот распоред и краткото време за подготовка, во таборот на Охрид владее максимална концентрација. Левиот бек на охриѓани, Дејан Кукуловски, истакнува дека Бутел е квалитетна и млада екипа која игра брз ракомет и секогаш бара шанса за докажување. Тој потенцира дека дисциплината во двете фази од играта ќе биде клучна за оправдување на фаворитската улога.
„После европскиот натпревар нè очекува натпреварот против екипата на Бутел, една одлична екипа составена воглавно од млади играчи кои многу трчаат и сакаат да се докажуваат. Немаме многу време да се подготвуваме поради густиот распоред, но добро ја познаваме екипата на Бутел од домашното првенство и со една дисциплинирана игра- како во напад, така и во одбрана, да ја оправдаме фаворитската улога.“- изјави Кукуловски.
Натпреварот против Бутел ќе биде важен тест за ротацијата и одржувањето на формата пред реваншот во Прага. Охрид ќе се обиде со сигурна и одговорна игра да ги задржи бодовите дома и во позитивна атмосфера да отпатува на европската пресметка викендов. Натпреварот ќе се одигра во 18:00 часот.
