МЗТ Скопје уште еднаш потврди зошто е водечка сила во македонската кошарка, откако во финалето на Купот на Македонија „Благоја Георгиевски – Буштур“ убедливо го совлада домаќинот МКК Куманово со 70-96. Со овој триумф, аеродромци стигнаа до четвртиот куп-трофеј во низа и вкупно 14-ти во клупската историја.
Пред околу 3.500 гледачи во Куманово, неизвесност имаше само во воведните минути, кога резултатот беше израмнет (18-18). Потоа следуваше серија на „сино-белите“ од 14-1 за водство од 19-32, со што практично беше најавен исходот. До полувремето МЗТ замина со предност од 15 поени (33-48), а во третиот период разликата порасна и до максимални плус 25.
Најефикасен кај победникот беше Меквин со 23 поени, додека Гил додаде 17. Значаен придонес имаше и Андреј Магдевски со 12 поени, осум скокови и шест асистенции. Во редовите на Куманово, Митевски, Ѓуроски и Луковиќ постигнаа по 13 поени, но тоа не беше доволно за посериозен отпор против разиграниот шампион.
За МЗТ ова беше 19-то куп-финале, додека Куманово по вторпат играше меч за трофејот – и повторно беше поразен токму од составот од Аеродром. Со оваа победа, МЗТ ја зацврсти позицијата на врвот на „вечната листа“ со 14 трофеи, пред Работнички кој има десет.
Куп-титулата МЗТ првпат ја освоија во 1996 година, а низ историјата по два трофеи имаат Тиквеш и Гостивар, додека по еднаш славеле Вардар, Кочани Деликатес, Карпош Соколи, Амак СП и ТФТ.
Освен Купот, МЗТ сезонава веќе го освои и Суперкупот на Македонија, а амбициите остануваат високи – двојна круна на домашната сцена и сериозен настап во АБА-2 лигата во борбата за место меѓу регионалната елита.
