И покрај убедливиот триумф на Охрид со 30-21 во „Билјанини Извори“, во таборот на Дукла Прага не изостанаа пофалбите за домашниот состав и атмосферата во салата. Чешкиот тим се соочи со расположен голман, цврста одбрана и мотивиран противник, што беше пресудно во првиот осминафинален дуел од Европскиот куп.
Пивотменот Кристијан Дуда, кој постигна четири гола на натпреварот, во ексклузивна изјава за Спортска Мрежа, истакна дека очекувале тежок предизвик и силен отпор од Охрид. Тој нагласи дека атмосферата оставила силен впечаток врз него и неговите соиграчи, но и дека Дукла нема да се откаже во реваншот во Прага, каде ќе се обидат да изненадат.
,,Мечот беше навистина тежок, како што и очекувавме. Морам да кажам дека навивачите и атмосферата беа одлични, би сакал тоа да го имаме и во Прага, но за жал го немаме. Исто така очекувавме многу добра одбрана и расположен голман..така и беше. За реваншот следниот викенд, ќе се подготвиме најдобро што можеме и ќе се обидеме да го изненадиме Охрид, имаме шанси, па мислам дека ќе дадеме сè од себе. Се надевам дека кај нас ќе имаме поддршка од навивачите, посакувам и се надевам дека ќе дојдат како навивачите тука. И уште еднаш морам да нагласам, атмосферата беше одлична и навистина ми се допадна, можеби и најубавото нешто што сум го искусил досега.“ – изјави Дуда за Спортска Мрежа.
Иако Дукла во Прага ќе влезе со негатива од девет голови, изјавите од нивниот табор најавуваат борба до последната минута. Од друга страна, Охрид со самодоверба и квалитет ќе патува на реваншот, решен да го завери пласманот меѓу најдобрите осум во Европскиот куп.
