Ракометарите на Охрид без поголеми проблеми ја завршија домашната задача против Куманово, запишувајќи убедлив триумф од 30-14, во натпревар кој послужи како идеална увертира пред европскиот предизвик во ЕХФ Европскиот Куп.
Избраниците на Борис Ројевиќ уште од старт наметнаа силно темпо и брзо ставија до знаење во која насока ќе се движи натпреварот. По само десетина минути игра, резултатот 8-1 беше јасен показател за разликата во квалитет, а до паузата „гладијаторите“ веќе имаа комотна предност од 15-5.
Во продолжението, охридскиот стратег им даде шанса на сите ракометари од ростерот, а контролата врз играта не беше доведена во прашање. Куманово тешко создаваше закани, особено од бековските позиции, што му овозможи на домашниот тим мирно и рутински да го приведе мечот кон крај.
Со овие нови бодови, Охрид се зацврсти на второто место на табелата со 33 освоени бода, веднаш зад лидерот Вардар (38), додека актуелниот шампион Еурофарм Пелистер е трет со 32 бода и натпревар помалку.
По европската пресметка со Дукла Прага, охриѓани во среда, на 18 февруари, ги очекува дуел со Бутел Скопје, додека Куманово во следното коло ќе гостува кај Тиквеш.
