Ракометниот клуб Охрид продолжува да ја потврдува сериозноста на својот проект и високите амбиции за продолжението од сезоната. По одличните резултати во домашното првенство и историскиот настап во Европа, охриѓани се на прагот да договорaт уште едно големо засилување во бековската линија.
Според сознанијата кои ги имаме, нов член на охридскиот состав би можел да стане искусниот лев бек Вуко Борозан, кој по разделбата со Вардар е во потрага по нов клуб. Црногорскиот ракометар се поврзуваше со неколку опции – камбек во татковината, ангажман во Словенија или трансфер на Блискиот Исток, но сè поизвесно е дека ќе остане во македонскиот ракомет.
Охрид во меѓувреме се раздели со Младен Крсманчиќ и Теимураз Орјоникидзе, со што се отвори простор за ново име во бековската ротација. Потенцијалното доаѓање на Борозан би значело значително засилување за тимот на Борис Ројевиќ – играч со богато искуство, силен шут и цврстина во двете фази од играта.
Резултатите од есенскиот дел од сезоната јасно говорат за напредокот на охриѓани. Во салата „Билјанини извори“ паднаа и Еурофарм Пелистер и Алкалоид, а клубот за првпат ќе презими во Европа, со реални шанси за продолжување на настапот во Купот на ЕХФ.
Доколку трансферот биде официјализиран, Борозан би потпишал договор до крајот на сезоната и би бил важна алка во битките и во Супер лигата и на европската сцена. За него, Охрид би бил трет македонски клуб во кариерата, по настапите за Металург и Вардар.
Со ваквиот потег, Охрид уште еднаш покажува дека не гради тим за краток рок, туку проект кој има амбиција да се позиционира меѓу најсилните во македонскиот ракомет. Останува да се види кога клубот официјално ќе го потврди трансферот и под кои услови искусниот бек ќе пристигне покрај Охридското Езеро.
