Како што ексклузивно најави Спортска Мрежа уште на 9 јануари, денес Осогово го потврди трансфер на Филип Димоски кој беше промовиран во кочанскиот второлигаш.
Филип Димоски брзо пронајде нова средина по разделбата со прилепска Победа и кариерата ја продолжува во дресот на „жетварите“.
26-годишниот прилепчанец одново ќе го облече дресот на Осогово, откако во неговиот прв престој во Кочани го носеше дресот на Осогово во период од август 2018 до јануари 2019 година.
Димоски зад себе има солидна есен во дресот на Победа, каде што беше еден од поважните фудбалери, а претходно значително придонесе и за директниот опстанок на прилепчани минатата сезона. Сепак, во текот на зимската пауза реши да побара нов предизвик и да ја прифати понудата од кочанскиот второлигаш, како што веќе објави Спортска Мрежа, а клубот денес ги потврди нашите најави.
Ангажманот на Димоски е дел од плановите на клубот да го зацврсти ростерот и да обезбеди поголема сигурност во продолжението од сезоната.
Низ својата кариера, новиот фудбалер на Осогово има настапувано за повеќе македонски клубови меѓу кои Детонит Плачковица, Охрид, Каменица Саса, Питу Гули, Вардар Неготино, Осогово, 11 Октомври, како и за Победа, од каде што и пристигнува во Кочани.
Со доаѓањето на Филип Димоски, Осогово добива проверено име и играч со искуство, од кого се очекува да има значајна улога во остварувањето на клупските амбиции во пролетниот дел од второлигашкиот шампионатот.
