Второлигашот Кожуф утре ќе означи почеток на зимските подготовки за вториот дел од сезоната под водство на Иван Варадиновски.
Утре штипскиот стратег ќе ја има првата прозивка со која ќе бидат означен почетокот на зимските подготовки. Тренерот ќе го има првиот собир со фудбалерите во 2026 година, по стандардниот состанок и соопштување на планот за подготовки ќе биде одработен и првиот тренинг.
Како што ексклузивно дознава Спортска Мрежа тимот од Гевгелија се засилува со неколку фудбалери – се работи за Ристе Лембовски, Давор Богевски, Лука Варешаноски, Давид Ивановски и голманот Антонио Шемковски кој е повратник во редовите на Кожуф.
Лембовски кој има 21 година доаѓа од редовите на Вардар Неготино кој е негов матичен клуб, а има настапувано и за Македонија ЃП.
19-годишниот Богевски последно беше дел од Слога Виница, а прилепчанецот кој првите фудбалски чекори ги направи во Перак, беше дел и од прилепска Победа.
Варешаноски е млад фудбал кој има 17 години, а почетоците ги имаше во тимот на Прилеп, потоа настапуваше за Победа, младинските категории на Брера Струмица, а последните шест месеци ги помина во дресот на Победа.
Ивановски кој има 18 години настапуваше во швајцарскиот тим Винтертур, а пак Шемкоски се враќа во Кожуф по шест месеци во Големо Коњари, а се работи за голман кој има 21 година.
Според информациите на Спортска Мрежа тимот од Гевгелија ќе биде засилен со уште најмалку две засилувања, а целта е директен опстанок односно пласман во првите осум на табелата.
Како што дознаваме веќе тимот од Гевгелија ги има договорено пријателски натпревари преку кои ќе се „бруси“ формата – против Беласица, Арсими, Победа Валандово, Работнички и Детонит Плачковица.
Кожуф презимува на деветтото место на табелата или во бараж зоната за опстанок со 22 бодови на своето конто, а пролетниот дел го отвара против штипска Брегалница.
Од тимот како што веќе објави Спортска Мрежа заминаа Николче Шаркоски, Благоја Спиркоски кој веќе е нов фудбалер на Охрид и голманот Борче Картов.
