Новиот напаѓач на Шкендија, Фахд Нзенгуе, не го крие задоволството од трансферот во тетовскиот клуб и јасно ги истакна причините поради кои се одлучи да ја прифати понудата на актуелниот македонски шампион. Габонскиот офанзивец пристигна како слободен играч по разделбата со Брера Струмица, иако, како што самиот вели, интерес имало и од други клубови.
„Секогаш е задоволство да се биде дел од голем тим, со големи играчи, со големи цели. Затоа, среќен сум што сум тука и ќе се обидам да дадам се од себе за да му помогнам на тимот. Единственото нешто што треба да го знам е дека Шкендија е најдобриот тим во Македонија. Тука ќе можам да растам како играч. Шкендија е најдобра, бројките го покажуваат тоа“, истакна Нзенгуе за клупската страница..
Тој дополнува дека изборот не бил комплициран, бидејќи сака да игра на највисоко можно ниво и со квалитетни соиграчи.
„Сакам да играм со најдобрите и во најдобриот тим. Значи да, затоа сум тука“, додава новото засилување на „црвено-црните“.
Од Шкендија потврдија дека Нзенгуе потпиша договор до летото 2028 година, а напаѓачот посочи дека борбата за титулата е приоритет, додека настапите во Конференциската лига ги гледа како дополнителен мотив.
„По мое мислење, прво е титулата. Ја освоивме минатата сезона, па зошто да не и втора по ред? Сигурен сум дека можеме и дека ќе успееме“, порача Нзенгуе.
Во првиот дел од сезоната во ПМФЛ, габонскиот напаѓач настапи на 16 натпревари и постигна осум погодоци, а во Шкендија пристигнува со јасна цел – голови, победи и нов трофеј за тетовскиот клуб.
