Министерот за спорт Борко Ристовски, новата 2026 година ја започна со работна посета во Кавадарци, каде беше направен увид во изградбата на затворениот базен, инвестиција од 45 милиони денари.
Заедно со министерот Ристовски беше и премиерот Христијан Мицковски, како и градоначалникот на општина Кавадарци, Митко Јанчев. Во овој спортско рекреативен објект ќе има и СПА центар.
„Ова е еден убав почеток на годината, работен почеток на сè она што Владата на Република Македонија, и преку Министерството за спорт и преку другите ресорни министерства, го вложува во локалните самоуправи. Спа центарот којшто денес го најави градоначалникот, јас би додал тука дека е и базенот кој што беше почнат пред повеќе години, а веќе мислам дека добива една поинаква слика за базенот и сигурен сум дека до крајот на месец август некаде ќе биде завршен и ќе биде пуштен во употреба и предаде на општина Кавадарци и ќе може сите граѓани да ги чувствуваат бенефитите и сите оние дечиња кои што е главна дејност на базенот да учат пливање, нормално и сите оние кои што сакаат да се рекреираат. Објектот чини 45 милиони денари плус ДДВ, пари коишто се обезбедени директно од министерството за спорт, нормално со поддршка на Владата, додека спа центарот е проект финансиран од АА Програмата или директна поддршка од Владата преку министерството за спорт“, рече министерот за спорт Борко Ристовски.
Како што истакна и министерот Ристовски, спортската инфраструктура е многу важен сегмент за функционирањето на спортот.
„Оваа 2026 година како што кажа и градоначалникот ќе биде една градежна експанзија во сите сегменти на живеењето, меѓутоа и во делот на спортската инфраструктура каде што мислими и цениме дека спортската инфраструктура е многу важен, ако не и најважен сегмент на функционирањето на спортот и на создавање на услови за спортот да може да се развива и да бараме резултати“, нагласи Ристовски.
