Последниот македонски претставник на европската сцена во сезоната 2025/2026, вице-шампионот Штип УГД, утре попладне од 17:30 часот во салата „Центро Павеси“ во Милано ќе го одигра реванш-натпреварот против Алијанц Милано, во рамките на 1/16 финалето од Челинџ купот.
Штипскиот состав на првиот дуел во Радовиш, одигран пред нешто помалку од еден месец, беше поразен во три сета од фаворизираниот италијански тим. На гостувањето во Милано, македонскиот претставник ќе настапи без главниот тренер Кристијан Ристески, кој поради здравствени причини нема да биде на клупата.
„Со пласманот во 1/16 финалето испишавме клупска историја. Свесни сме дека Алијанц Милано е фаворит, што го покажа и на првиот натпревар, но во реваншот ќе се обидеме да пружиме што е можно поквалитетен отпор и да одиграме на највисоко ниво. Не сме оптоварени со резултатот“, истакна Ристески во пресрет на дуелот.
Во своето дебитантско европско учество, Штип УГД до главната фаза од Челинџ купот стигна откако по драматичен „златен сет“ го елиминираше норвешкиот Кол Ил.
