Македонското судење доби значајно признание на европско ниво, откако УЕФА ја финализираше најновата листа на арбитри кои од 2026 година ќе добијат можност да делат правда на меѓународната сцена.
По спроведените семинари, едукации и проценки, двајца македонски судии ја добија довербата на УЕФА и ќе бидат дел од елитното европско судиско семејство.
Во фудбалската конкуренција, нов носител на УЕФА значка е Стојанче Трпчевски, судија со долгогодишно искуство на натпреварите во Првата и Втората македонска лига. Кавадарчанецот со своите настапи и континуитет во домашните натпреварувања успеа да се избори за место на најновата УЕФА листа.
Позитивни вести пристигнуваат и од футсалот, каде Александар Урошевиќ е селектиран меѓу новите меѓународни футсал судии. Ова претставува дополнителен показател за напредокот и квалитетот на македонското судење и во оваа дисциплина.
Овие избори претставуваат големо признание за македонските судии, но и потврда дека со посветена работа и професионален пристап може да се стигне до европската сцена.
