Младинските академии на ФК Вардар и ФК Бутел 2017 постигнаа договор за идна соработка, со цел унапредување на развојот на младинскиот фудбал и создавање подобри услови за напредок на младите фудбалери.
Со овој договор, двете страни воспоставуваат партнерски односи кои ќе овозможат меѓусебна размена на играчи, спортски знаења и практики, како и заедничка работа во насока на откривање, развој и промоција на млади фудбалски таленти.
ФК Бутел 2017 во јавноста е препознаен како расадник на млади и перспективни играчи, а соработката со најтрофејниот македонски клуб, ФК Вардар, претставува значаен чекор кон подигање на квалитетот на младинскиот фудбал во земјава.
Од младинската академија на ФК Вардар изразија уверување дека ова партнерство ќе донесе позитивни резултати за двете страни, како и за младите фудбалери кои ќе добијат можност за континуиран развој во професионална средина.
Воедно, од Вардар до ФК Бутел 2017 им посакаа успех за организацијата на традиционалниот новогодишен турнир, на кој годинава ќе настапуваат екипи од генерацијата 2017, меѓу кои ќе биде и екипата на Вардар.
Соработката меѓу двете академии е уште еден доказ дека младинскиот фудбал мора да се гради системски и со визија, со цел создавање на идните носители на македонскиот фудбал.
