Денес во Струмица се одигра вториот контролен натпревар помеѓу младите селекции на Македонија и Црна Гора У18 каде Македонија повторно славеше со 2:1.
Македонија прва го отвори резултатот во 21. минута, кога по една опасна акција и нафрлување во шеснаесетникот, Новак Фатиќ реагираше несигурно и со автогол ја испрати топката во сопствената мрежа. Тоа им донесе предност на нашите млади фудбалери и дополнителна самодоверба за продолжување со офанзивната игра.
Сепак, противникот не се повлече. Веднаш по примениот гол ја крена играта и успеа да ги стабилизира редовите. Нивниот притисок резултираше со израмнување во 27. минута, кога Андрија Вукоје успешно ја заврши акцијата и го постави резултатот на 1:1. Голот внесе нова неизвесност и го подигна интензитетот на натпреварот.
Во второто полувреме Македонија повторно ја презеде иницијативата. Само четири минути по почеток на второто полувреме , во 49. минута, Иво Марковски се најде на вистинското место и со прецизен удар ја врати предноста за нашата селекција. Голот се покажа како пресуден, бидејќи до крајот на средбата противникот не успеа да најде решение за добро организираната македонска одбрана.
Нашите млади репрезентативци ја задржаа контрола врз натпреварот, покажаа зрелост во клучните моменти и со умна игра го приведоа мечот до крај, обезбедувајќи уште една победа и дополнителна потврда за нивниот напредок.
