По болниот пораз од Вардар на домашен терен, во минатото коло, ракометарите на Охрид покажаа дека можат брзо да се опорават, славејќи убедлива победа над Еурофарм Пелистер 2 со 33-20.
Со оваа победа, „гладијаторите“ се зацврстија на третото место на табелата со 23 бодови, веднаш зад Вардар и Еурофарм Пелистер. Веќе во среда, ги очекува гостување кај незгодниот Тиквеш во Кавадарци.
Веднаш по натпреварот, централниот бек на Охрид – Младен Крсманчиќ, во изјава за Спортска Мрежа истакнува дека по поразот од Вардар екипата не се предала, туку останала мотивирана и сериозна. Тој додава дека првенството е долго и дека има уште многу можности за подобри резултати, а денешниот натпревар ја покажал посветеноста на играчите.
„Искрено, после болниот пораз од Вардар во дербито.. на никој од нас тоа не му падна лесно, меѓутоа главата горе – уште баш многу има да се игра. Првенството е долго, така што ништо не е изгубено, можеме уште да играме и да се бориме, па можеби следниот пат ќе бидеме поефикасни и подобри. Така влеговме и во овој натпревар денес, најсериозно го сфативме противникот, а тоа го покажува и резултатот и можам да кажам дека сме задоволни.“- изјави Крсманчиќ.
Победата ја потврди посветеноста и борбеноста на Охрид, а позитивен момент е и фактот што играчите покажаа дека можат брзо да се опорават по болен пораз.
Следното гостување кај Тиквеш ќе биде нов предизвик за охриѓани во продолжението на сезоната.
