Необичен и ретко виден момент го одбележа натпреварот меѓу Брегалница и Шкендија во рамки на 14. коло од помладата пионерска суперлига. Иако дуелот заврши со минимална победа на гостите од Тетово (2:3), вниманието го привлече ситуацијата во 21. минута, кога главниот судија мораше да го напушти мечот поради повреда.
Додека играта се одвиваше на средината од теренот, фудбалер на Брегалница ја водеше топката, а играч на Шкендија се обиде да интервенира. Во тој момент, ненадејно, фудбалерот на Шкендија се судри директно со главниот судија Петар Михаилов од Кочани. Сударот беше доволно силен за судијата да не може да продолжи со водење на натпреварот.
Настанот е официјално заведен и во записникот од натпреварот:
„Поради повреда на главниот судија во 21. минута првиот помошник Спире Арсов го продолжи натпреварот“, се наведува во записникот.
По интервенцијата, мечот продолжи под водство на првиот помошник судија Спире Арсов, кој ја презеде улогата на главен судија до самиот крај.
Необичниот момент веќе предизвикува внимание меѓу љубителите на младинскиот фудбал, а видеото од ситуацијата брзо се проширува на социјалните мрежи.
