По долги години пауза, фудбалот конечно се врати во радовишкото село Злеово. ФК Слога, единствениот активен клуб од Општина Радовиш што се натпреварува во општинската лига на Струмица, ја оживеа спортската сцена и повторно го раздвижи селото кое со нетрпение ги очекува секој нов натпревар.
Во општина Радовиш, покрај второлигашот ФК Детонит Плачковица, единствен клуб што активно настапува во сениорска конкуренција е токму ФК Слога од Злеово.
Слога зад себе има фантастична есенска полусезона. Тимот го заврши првиот дел од шампионатот на високо трето место, со учинок од 4 победи, едно реми и два порази, што им донесе вкупно 13 бодови. Нападот на Слога се покажа како најмоќен во целата лига – 22 постигнати гола, што го прави најофанзивен тим во конкуренцијата. Тимот од Злеово има само три бода помалку од есенскиот шампион Спартмани од Градско Балдовци, па во пролетниот дел ќе биде навистина „пеколно“.
Ефикасноста беше распоредена на многу фудбалери. Најдобри стрелци се Зоран Спасов и Рузгер Алемдар со по четири гола, зад нив со по три гола се Мите Стоименов и Стојанче Цветков. Свој белег остави и Садилов со два погодоци, додека по еден гол впишаа Кемал Усеинов, Оливер Цеков, Христијан Василев, Бојан Петров, Ване Ристов и Томе Рујков – што само ја покажува широчината и тимската игра на овој колектив.
Но статистиката е само дел од приказната. Во Злеово секој натпревар е вистински празник. Селото живее за фудбалот – од најмладите до највозрасните, сите излегуваат да ги бодрат момците кои со срце и пожртвуваност го бранат клубот. Враќањето на фудбалот повторно создаде заедништво, атмосфера и спортски дух какви што одамна недостасуваа.
Слога оваа есен покажа дека има потенцијал, страст и амбиција, а напролет со уште поголема поддршка од селото ќе ја продолжи борбата на врвот од табелата. Злеово конечно повторно живее фудбалски – и тоа се гледа, се чувствува и се слави.
