Репрезентацијата на Македонија до 20 години, предводена од селекторот Александар Таневски, денеска од 18:30 часот ќе го одигра својот прв контролен натпревар против Лихтенштајн. Мечот ќе се игра во Шан, на гостински терен.
Селекторот Таневски истакна дека тимот е мотивиран и подготвен за силен старт.
„Пред нас е првиот натпревар на репрезентацијата до 20 години против селекцијата на Лихтенштајн до 21 година. Во изминатите денови работевме фокусирано и со јасна идеја да поставиме квалитетна основа во нашата игра. Составот е млад, амбициозен и подготвен да се претстави на високо ниво. Го почитуваме противникот, но нашиот главен фокус останува на сопствената игра, дисциплината и колективната работа. Верувам во овие момци и во нивната способност организирано да одговорат на предизвиците.“
Таневски упати благодарност и до Фудбалската федерација на Македонија за поддршката и одличните услови за работа.
„Кога функционираме во професионална и стабилна средина, можеме да напредуваме и индивидуално и како тим. Убеден сум дека ќе дадеме максимум и дека ќе ја претставиме Македонија на вистински начин“, додаде селекторот.
