Екипата на Охрид продолжува со импресивната форма и е на чекор до тоа да стане есенски шампион во Втората македонска фудбалска лига. Популарните „рибари“ славеа со 1–0 против Детонит Плачковица, во тврд и неизвесен натпревар кој го реши голот на Иван Глигоров.
Клучен момент беше и одбранетиот пенал на голманот Дамјан Серафимов, кој го запре ударот од белата точка на Сашо Дуков и ја задржа предноста на својата екипа. Со оваа победа, Охрид ги освои нови, исклучително важни три бодови.
- Зошто Охрид е „речиси“ есенски шампион?
Во моментот Шкендија од Арачиново е лидер со 32 бодови, додека Брегалница и Охрид имаат по 30 бодови. Но, пресудниот фактор е што Охрид има натпревар помалку.
Во последното есенско коло, „рибарите“ гостуваат во Виница кај Слога. Со победа ќе стигнат до 33 бодови. Истовремено:
Брегалница, доколку слави во Прилеп над Победа ќе има 33 бодови, а Шкендија Арачиново, со евентуален триумф над Саса, би стигнала до 35 бодови.
Но пресвртот доаѓа од одложениот натпревар на Охрид против Голем Коњари, закажан за 3 декември. Ако Охрид победи и на овој меч, ќе стигне до 36 бодови, со што “рибарите” ќе бидат есенски шампиони со 36 бодови. Шкендија Арачиново би била втора со 35, а Брегалница трета со 33 бодови.
Токму затоа избраниците на младиот стратег Ромео Кочевски се на прагот да ја завршат полусезоната како лидери во Втората лига.
Но, најпрво ќе мора Охрид да ги добие двете најслаби екипи, кои на хартија се “лесни” противници и да ги обезбеди потребните шест бодови.
- Голема цел: Враќање во Првата лига
Доколку Охрид успее да го потврди очекуваниот расплет, тимот ќе презими како првопласиран, а во пролетниот дел ќе влезе со јасна амбиција – враќање во Првата македонска фудбалска лига по долга пауза.
Формата, атмосферата во тимот и континуитетот во резултатите даваат надеж дека Охрид е подготвен да оди до самиот крај.
