Екипата на Брегалница не успеа да стигне до трите бодови на домашен терен, во мечот од 14. коло на ВМФЛ. Особово одигра феноменален натпревар и со минимални 0–1 славеше огромна победа против штипјани, носејќи ги трите бодови назад во Кочани. Тимот на Крсте Крстев продолжува со одличните партии оваа сезона и се зацврстува во средниот дел од табелата.
Брегалница имаше идеална шанса да поведе при резултат 0–0, но Дарко Алексовски – Пеле не успеа да реализира пенал. Голманот Ѓорѓи Јованоски маестрално интервенираше, „се испружи како пантер“ и го одбрани ударот од белата точка.
Казната за промашениот пенал стигна брзо — Давид Голубов погоди за водство од 0–1 на полувреме во корист на Осогово. Во второто полувреме Брегалница силно притискаше да ја анулира негативата, но не успеа да дојде до гол.
Судијата Дони Ристовски од Гевгелија покажа уште еден пенал за домаќините. Одговорноста ја презеде Хусеин Демири, но повторно блескаше Јованоски — одбрани уште еднаш и ја сочува својата мрежа недопрена. Осогово со голема дисциплина и огромна пожртвуваност ги освои трите бодови, кои вечерва во Кочани се слават како голема победа.
- “Рибарите” речиси сигурни есенски шампиони
Охрид со минимални 1–0 славеше над Детонит Плачковица благодарение на погодокот на Иван Глигоров, кој го реши натпреварот. Гостите имаа шанса да израмнат во финишот, но Сашо Дуков не реализираше пенал. Трите бодови остануваат на Билјанини Извори.
Овој резултат најмногу му одговара на Охрид, бидејќи и Брегалница загуби, а пораз претрпе и лидерот Шкендија Рачиново.
- Шкендија Арачиново со пораз – Охрид на праг да биде есенски шампион
Лидерот Шкендија Арачиново претрпе минимален пораз 1–0 на гостувањето кај Новаци. Со ова Новаци му прави услуга на Охрид, кој речиси сигурно ќе ја заврши есенската полусезона на првото место.
Стрелец на победничкиот гол беше Мартин Андоновски.
Екипите на Вардар Неготино и Победа одиграа реми без голови 0–0, во единствениот натпревар од колото без постигнат погодок.
Беласица со сигурни 0–2 славеше на гостувањето во Македонска Каменица против Саса, враќајќи се на вистинскиот колосек.
Стрелци беа Бојан Спиркоски и Коста Манев.
Екипата на Скопје ја забележа најубедливата победа во колото, триумфирајќи со 4–0 над Енергетика Големо Коњари.
Армир Иса го отвори мечот за 1-0 на полувреме, во вториот дел погодија Васко Папалиски, Виктор Ангелов и Александар Анастасијески.
- Слога Виница со важни три бодови во Ресен
Слога Виница славеше со 1–2 на гостувањето кај Преспа, освојувајќи драгоцени три бодови кои им даваат надеж дека можат да се борат барем за опстанок преку бараж.
Октај Амедов со два гола обезбеди предност за тимот од Виница, а домаќинот имаше сили само за ублажување на поразот преку Бобан Кузмановски во 72. минута.
Дуелот меѓу Тетекс и Кожуф ќе се одигра на 3 декември, бидејќи беше одложен.
