Победа Валандово ја продолжи успешната серија и како апсолутен лидер во Трета лига – Исток славеше со 1:0 против цврстиот состав на Карбинци, во натпревар од 10. коло одигран пред верната валандовска публика. Иако домаќините беа фаворити, гостите покажаа борбеност, но еден момент пресуди и Победа го задржа својот непоразен статус.
Она што остава особено позитивен впечаток е реакцијата на ОФК Карбинци по натпреварот. И покрај поразот, клубот јавно му честиташе на противникот за победата, а воедно објави и редок позитивен пример за фер однос и беспрекорно домаќинство, упатувајќи благодарност до Победа Валандово.
Во продолжение следува целосното соопштение на ФК Карбинци:
„Натпреварот од десеттото коло на Тратата фудбалска лига Исток во Валандово, помеѓу Победа и ОФК Карбинци, заслужува да се одбележи и од еден друг аспект. За разлика од некои натпревари каде што на нашата екипа не и беше овозможувано да се доближи до паркингот пред службените простории со возилата, управата на Победа од Валандово покажа како треба да се однесуваме при пречекувањето на гостинските екипи. Од комуникацијата пред натпреварот, преку пречекувањето на екипата, заеднички ручек, логистика при пристигнување на стадионот – комплетно перманентна комуникација и грижа и за безбедноста и за чувството на добредојденост.
На теренот и за време на натпреварот, нормално, борба за секоја топка, навивање за својата екипа, реакции на судиски одлуки, онака како што се навива за својот клуб.
И ако на пример за секоја екипа не е изводливо гостите да ги пречека со ручек, бидејќи тоа зависи од буџетот со кој располага самиот клуб, од дарежливоста на спонзорите, за се друго – пречекот, безбедноста, комуникацијата, не е пресуден буџетот. Овде сите клубови може да бидеме многу подобри, да се трудиме да негуваме добри меѓу клупски односи, да овозможиме сите наши гостински екипи да се чувствуваат безбедно и пријатно.
ОФК Карбинци упатува благодарност од ФК Победа Валандово за приемот и пречекот на вчерашниот натпревар, тоа е пример кој треба да се следи.“
