Младиот и талентиран каратист Марко Џорлев од Штип оствари фантастичен успех на Државното првенство за кадети, јуниори и U21, кое викендот се одржа во Скопје. Во категоријата кадети -63 кг, Џорлев блескаше со доминантни настапи и заслужено го освои златниот медал, без ниту еден пораз.
Бидејќи турнирот воедно беше и изборен за Европското првенство во Кипар, Марко мораше да настапи и во плeј-оф борбите, каде повторно беше максимално успешен. Вкупно забележа шест победи од шест мечеви, покажувајќи зрелост, дисциплина и квалитет што го издвојуваат како еден од најперспективните млади каратисти во Македонија.
Со овој импресивен настап, Марко Џорлев официјално се квалификува за Европското првенство, каде што ќе ја претставува Македонија во кадетска конкуренција.
Џорлев по четврти пат е државен првак на Македонија, претходно трипати беше во конкуренција на пионери, а сега по прва како кадет.
Тој, сега стана член на кадетската карате репрезентација на Македонија и за првпат ќе учествува на Европското првенство кое ќе се одржува во Кипар во месец февруари.
Како што вели Марко Џорлев, кој е член на карате клубот Штип, за Спортска Мрежа, подготовките за ЕП започнуваат веднаш.
