ВИДЕО: Петрушевска херој – Истатов го доби дербито! Победи за Саса, Ас Јунајтед и лидерот Љуботен

Истатов предводен од искусниот стратег Кирил Изов слави во дербито на 13. коло откако во Пржино со минимални 1:0 ја совлада Тиверија Брера. Херој на мечот беше Кристина Петрушевска, која ја казни грешката во одбраната на струмичкиот тим. Голманката Викторија Панџурова беше немоќна да го спречи погодокот. Уште еднаш се потврдува – во Пржино тешко се освојуваат бодови, што претходно го почувствува и шампионот Љуботен.

Каменица Саса рутински со 0:4 го доби дебитантот Вардар на „Цементарница 55“. Драгана Костова отвори во 36. минута, а во вториот дел Бразилката Туане Де Соуза Фрагосо зголеми на 0:2, по што Христина Јовановска погоди за 0:3. Фрагосо со втор гол го постави конечниот резултат.

Ас Јунајтед ја декласираше екипата на Кочани со убедливи 7:0. Двојни стрелци беа Јована Павловска и Веса Села, а гол постигнаа и Кристина Мојоска, Теодора Далческа и Оливера Цоклеска.

Со головите на Кристина Крстева и Рабија Дервиши, тимот на Скопје славеше со 0:2 на гостувањето кај Речица, задржувајќи го чекорот со лидерот.

А токму лидерот и шампион Љуботен со убедливи 5:1 го декласираше Топ Гол во Битола. Во првиот дел погодија Ева Величковска, Елена Симјанова, Јулија Живиќ и Нигериската интернационалка Мариан Огочукву Охадиве. Во второто полувреме Меланија Грозданова зголеми на 5:0, а Мила Коњановска во финишот намали на 5:1.