Влазними есенски шампион – Могила пресилна, Алимоски блеска со нови голови

Могила ефикасно го „среди“ Демир Хисар со убедливи 6:1, славејќи висок триумф во рамки на деветтата рунда од Трета лига – Југозапад.

Во првиот дел Хакан Алимоски, најдобриот стрелец во лигата, и Александар Кочишки донесоа водство од 2:0. Во продолжение Могила беше уште посилна – Алимоски и Кочишки постигнаа уште по еден гол, а прецизни беа и Оливер Даралиовски и Дарио Бендеровски. За гостите погоди Виктор Ѓорѓиовски во 70. минута за конечни 6:1.

Во Ношпал немаше фудбал – Напредок доби службени три бодови (3:0) против Велешта, која не се појави по 30-минутно чекање.

Во Дебар трите бодови останаа дома – Кораб славеше со минимални 1:0 благодарение на голот на Крешник Врлаку, постигнат во 80. минута против Света Троица.

Влазними е новиот есенски шампион, откако на домашен терен со 3:1 го совлада Кравари. Стружани поведоа рано – Самед Кадриоски погоди во 8. минута, а Фабиан Коџаџику во 15. минута удвои за 2:0. Во вториот дел Темур Емини намали на 2:1, но само две минути подоцна Денис Шадов ги постави конечните 3:1.

Поранешниот второлигаш Караорман направи пресврт и славеше против Славеј Мешеишта со 2:1. Гостите поведоа рано преку Антонио Ќитаноски, но во 82. минута несреќниот автогол на Валентин Ѓорѓиески го врати Караорман во игра. Во 86. минута искусниот Игор Клечкароски донесе целосен пресврт и важни три бода.