Битолскиот шампион, Еурофарм Пелистер ја продолжи доминацијата во домашното првенство, убедливо победувајќи го Бутел со 31-21 (16-10). „Зелените“ не оставија простор за резултатска неизвесност, продолжувајќи го притисокот врз лидерот Вардар. Екипата на Бутел,пак, останува седмопласирана со 11 бода.
Домаќините започнаа фуриозно. Со две брзи серии поведоа 4-1 во 5. минута, а во 13. минута разликата веќе изнесуваше 9-2. Континуираниот притисок на теренот и одличната игра на Еурофарм Пелистер го поставија победникот уште во првото полувреме, кое заврши со 16-10.
Во второто полувреме темпото го диктираа домаќините. Разликата се одржуваше на 6-8 гола, а во 48. минута Мирче Калајџиоски ја зголеми предноста на десет гола (25-15). До крајот на мечот победникот беше јасен, па тимот имаше простор за индивидуални потези и тестирање нови акции.
Во следното коло Бутел ќе го пречека Радовиш, додека Еурофарм Пелистер патува во Скопје за дуел со Пролет.
