Беласица немилосрдна за Вардар Неготино, Осогово ја „распарчи“ Победа, реми во Радовиш, Охрид до три бода!

Денес се одиграа натпреварите од 11. коло во Втората македонска фудбалска лига, а најефикасен меч се одигра во Струмица, каде Беласица со убедливи 8:1 го совлада Вардар Неготино.

Двојни стрелци за струмичани беа Александар Коцев, Бојан Спиркоски и Александар Милушев, додека по еден погодок постигнаа Костадин Капсаров и Стефан Секирски. За гостите единствен стрелец беше Диме Великов.

Во Автокоманда, екипата на Скопје славеше со сигурни 2:0 над Преспа, а херој на натпреварот беше Армир Иса со два постигнати гола.

Големо Коњари не успеа да одолее на гостите од Македонска Каменица, откако Саса славеше со 1:3. За тимот од Македонска Каменица погодија Тони Мичковски, Андреј Симевски и Махир Ајрули, додека Амил Табаковиќ беше стрелецот за домашните.

Во Радовиш, Детонит Плачковица и Новаци ги поделија бодовите играјќи 1:1. Сашо Дуков донесе водство за радовишани во 59. минута, но Христијан Драгарски израмни во завршницата на мечот. Радовишани можат да жалат за трите бодови, бидејќи во првиот дел Дуков имаше голема шанса, но реализираше, а пак Александар Смилков ја стресе гредата.

Слога Виница на домашен терен загуби со 2:4 од Брегалница Штип. За Слога погодија Бојан Кoлишев и Октај Амедов, а за гостите стрелци беа Дамјан Масевски, Давид Калпачки и Хусеин Демири, додека Александар Илиев од Слога си постигна автогол.

Шкендија Арачиново го совлада КожуФ со 2:0. Амир Нухија погоди во судиското надополнување на првото полувреме, а во вториот дел автогол постигна Филип Дамевски, со што Шкендија запиша нова победа.

Атрактивен меч се одигра покрај Охридското Езеро со среќен крај за Охрид кој со 4:3 славеше над Тетекс.

„Штофарите“ од Тетово имаа два гола предност преку Даниел Николовски и Рихан Зеќири, а во 35. минута домашниот тим преку Иван Глигоров намали на 1:2 на полувреме.

Во вториот дел домашниот тим направи комплетен пресврт, откако „рибарите“ поведоа со 3:2 преку погодоците на Филип Ѓоргоски и Димитриј Попоски во 76. минута.

Сепак во 85. минута од мечот Меритон Салији погоди за 3:3, но по три минути игра Бојан Затуроски постигна гол за конечни 4:3 со што трите бодови останаа во Охрид.