Градоначалникот на општина Василево, Славе Андонов, оствари продуктивна средба со претседателот на Општинскиот фудбалски сојуз – Струмица, Илија Илиев – Рома, претставник на Фудбалската федерација на Македонија, на која главна тема беше развојот на фудбалската инфраструктура и поддршката за локалните клубови.
Во разговорот, посебен акцент беше ставен на ФК Единство од Пиперево, клуб кој оваа сезона се натпреварува во Општинската фудбалска лига – Струмица. Општината веќе обезбедува финансиска поддршка, а како што најави градоначалникот, таа ќе продолжи и ќе се прошири со нови инвестиции во спортските терени во Василево и Пиперево.
Андонов истакна дека приоритет е и повторно активирање на фудбалскиот клуб од Василево, кој од идната година се очекува да се приклучи во општинската лига, со што би се зајакнал спортскиот живот во заедницата.
“Остварив плодна средба со претседателот на Општинскиот фудбалски сојуз – Струмица, г. Илија Илиев, претставник на Фудбалската федерација на Македонија. Општина Василево ќе продолжи да обезбедува финансиски средства за ФК Единство од Пиперево, како и за новите инвестиции што ги планираме на фудбалските терени во Василево и Пиперево. Моја цел е и фудбалскиот клуб од Василево идната година, да почне да се натпреварува во општинската лига. Спортот и младите остануваат еден од врвните приоритети во развојот на нашата општина”, рече градоначалникот на општина Василево, Славе Андонов.
Со ова, општина Василево уште еднаш потврдува дека спортот и младите остануваат во фокусот на локалниот развој.
