Во рамките на деветтото коло од ракометната Суперлига беа одиграни неколку интересни натпревари кои донесоа нови возбудувања и поместувања на табелата. Лидерите ја оправдаа фаворитската улога, додека неколку екипи од средината на табелата ја искористија приликата за приближување до плејоф местата.
Во дербито на колото Вардар во Скопје го совлада Бутел со 36-30 и ја задржа лидерската позиција со максимален ефект. Иако „црвено-црните“ во дел од мечот имаа проблеми со расположениот противник, сепак искуството и поголемиот квалитет пресудија во нивна корист. Најефикасен во редовите на Вардар беше Николас Боно со седум гола, а Филип Талески додаде шест. Кај Бутел најдобар стрелец беше Дејан Михајловиќ со осум погодоци.
Шампионот Еурофарм Пелистер во Битола лесно се справи со Радовиш, славејќи убедливо со 47-27. И покрај тоа што настапи со комбиниран состав, битолскиот тим од самиот почеток доминираше и рутински стигна до нови два бода. Алем Хаџиќ беше одличен со 11 голови, а Хакбарт реализираше осум.
Алкалоид во Автокоманда немаше проблеми против вториот тим на Еурофарм Пелистер, славејќи со 37-25. Избраниците на Кирил Лазаров рано ја презедоа контролата, а до полувреме имаа сигурна предност која без потешкотии ја задржаа до крај. Мартин Серафимов и Ненад Костески беа најпрецизни кај победничкиот состав.
Пролет 62 на гостувањето во Струга дојде до важни бодови со победа од 38-29. Тимот од Скопје доминираше од првата минута, играше дисциплинирано и во напад и во одбрана, а извонредниот Давор Палевски блесна со дури 15 постигнати гола.
Тиквеш ја продолжи позитивната серија и на домашен терен го совлада Прилеп со 24-21. Кавадарчани покажаа зрелост и контрола во текот на целиот натпревар, а триумфот им овозможи да се приближат до местата што водат во плејофот. Богдан Мијушковиќ беше најдобар стрелец со пет гола, додека кај Прилеп се истакна Димитар Димитриоски со осум погодоци.
Претходно, како што веќе информираше Спортска Мрежа, Охрид без проблеми го декласираше Куманово со 37:17, во меч каде голманот Даниел Ѓорѓески беше фантастичен на голот со 19 одбрани.
По ова коло, Вардар останува единствениот тим без пораз, Алкалоид и Еурофарм Пелистер чекорат веднаш зад него, а Пролет и Тиквеш ја зацврстија својата позиција во горниот дел од табелата. Суперлигата продолжува следниот викенд со уште неколку дерби средби кои можат дополнително да ја „замешаат картата“ на пласманот пред зимската пауза.
