Фудбалерите на Могила во шестото коло од Третата лига – Југозапад ќе имаат нов гостински предизвик. Овојпат, ќе гостуваат кај Славеј од Мешеишта, екипа која сезонава бележи солидни резултати со само еден пораз на пет одиграни натпревари.
Могила влегува во мечот во одлично расположение, по две последователни победи и со најдобра гол-разлика во лигата. Тимот е во налет на форма, а тоа го потврди и Дарио Бендеровски, еден од најдобрите играчи на екипата во досегашниот тек од сезоната.
„Како екипа имаме одлични услови за работа и зад нас се две победи кои донесоа дополнителна самодоверба. Радува фактот што играме надмоќно и создаваме многу шанси. По пет кола имаме 16 постигнати погодоци, што нè прави најофанзивна екипа во лигата“, изјави Бендеровски.
Иако Могила четири од првите шест натпревари ги игра на гостински терен, младите фудбалери од оваа екипа покажуваат стабилност и карактер, задржувајќи се на високото второ место на табелата.
„Од натпревар во натпревар растеме, се надградуваме и учиме. Мотивирани сме да покажеме дека нашата младост и енергија можат да бидат нашата најголема сила,“ додаде Бендеровски.
Дуелот меѓу Славеј и Могила се очекува да понуди возбудлив фудбал, со две екипи во добра форма и со јасна цел – продолжување на позитивната серија.
