По импресивното издание против шпанскиот првак Барселона, Еурофарм Пелистер го очекува нов предизвик во Лигата на шампионите – дуел со германскиот Магдебург, тимот кој минатата сезона беше најдобар во Европа.
Натпреварот го најави тренерот на битолчани, Рубен Гарабаја. Во пресрет на мечот, тој посочи колку е важна концентрацијата и максималната подготвеност на тимот:
“Се надевам дека ќе можеме да бидеме уште подобри од мечот со Барселона, затоа што одигравме одлично. Не бевме перфектни, но бевме близу. Ако не сте компактни и безгрешни против тим како Магдебург, сигурно ќе имате многу проблеми. Ќе видиме кои играчи се најподготвени за настап, нема да ризикуваме со оние што не се 100% фит. Ќе дадеме максимум со кадарот што го имаме на располагање. Сите знаат каков стил негува ривалот, брз, со опасни контри и лесни голови. Ќе се обидеме да ја зграпчиме секоја прилика што ќе ни се пружи.”- изјави тренерот на Пелистерци, Рубен Гарабаја.
Еурофарм Пелистер со нетрпение го очекува натпреварот, подготвен да покаже ново, силно издание. На теренот ќе излезе мотивиран и подготвен да ги покаже своите најдобри партии, надевајќи се на уште еден впечатлив резултат во Лигата на шампионите. Натпреварот меѓу Магдебург и Еурофарм Пелистер ќе се игра утре во „Гетек Арена“ со почеток во 20:45 часот.
