Македонските шампиони Струмица 47&72 во машка и Јанта Волеј КВ во женска конкуренција, денес ќе имаат настапи во рамките на квалификациите за ЦЕВ Лигата на шампионите, со двојна програма во спортскиот центар „Јане Сандански“ во Скопје.
Машкиот првак Струмица 47&72 четврта година по ред ќе биде дел од најпрестижното европско натпреварување, а на стартот ќе има сериозен предизвик – дуел против најтрофејниот романски клуб Динамо Букурешт, денес од 17 часот.
„Четврта година во низа сме дел од најквалитетното европско натпреварување, но оваа сезона имаме подмладен состав и поскромни амбиции. Целта е младите играчи да стекнат искуство, а со поддршка од поискусните да прикажеме квалитетна игра и достоен отпор. Зошто да не освоиме и еден сет“, изјави капитенот Ефтим Ричлиев.
Македонскиот репрезентативец Кристијан Илиев додаде:
„Динамо Букурешт е фаворит, но токму тоа е мотив повеќе за нас да се докажеме.“
Во женска конкуренција, Јанта Волеј Кисела Вода ќе дебитира во Лигата на шампионите. Избраничките на тренерот Никола Јаневиќ ќе се соочат со трикратниот шампион на БиХ – Гацко, денес од 20 часот, исто така во „Јане Сандански“.
„Јанта Волеј КВ испишува историја со првото учество во Лигата на шампионите. Имаме противник по мерка и според анализите сме на исто ниво. Добро работевме во подготовките и имаме позитивна атмосфера во тимот. Скромни сме во очекувањата, сакаме да освоиме сет, а потоа ќе видиме што ќе донесе мечот“, изјави тренерот Јаневиќ.
Капитенот Тамара Тасевска додава:
„Самото учество е голем успех за нас. Помлада екипа сме, но тоа ни носи свежина и енергија. Работиме сериозно и посветено, и се надеваме на позитивен резултат – барем еден освоен сет, а можеби и нешто повеќе.“
Влезот за публиката во СЦ „Јане Сандански“ е слободен, а двата натпревара ќе бидат пренесувани во живо на каналот „Арена Спорт“.
