Второлигашот Брегалница Штип утре ќе го одигра осминафиналниот натпревар од Купот на Македонија против прволигашот Работнички. Средбата ќе се игра на стадионот „Железарница“ во Автокоманда, со почеток во 14:00 часот.
Пред дуелот, шефот на стручниот штаб на штипјани, Влатко Костов, истакна дека неговите фудбалери се подготвени и мотивирани да дадат максимум против реномираниот противник:
„На утрешниот куп натпревар против Работнички одиме максимално мотивирани и спремни. Нашата цел е победа и пласман во следната рунда. Работнички е клуб со квалитетни играчи и имаме целосен респект, но ние ќе ја играме нашата игра и ќе се трудиме да ја оствариме целта. На терен ќе излезат најдобрите и најспремните 11 играчи што моментално ни се на располагање. Очекувам добар и возбудлив меч и со дисциплинирана игра се надевам дека ќе се пласираме понатаму во Купот“, изјави Костов.
Брегалница сезонава игра во добра форма и ќе се обиде да приреди изненадување против фаворитот од Скопје, додека Работнички ќе ја бара својата потврда на квалитетот и место меѓу најдобрите осум екипи во Купот на Македонија.
