Еурофарм Пелистер ја запиша третата победа во новата сезона од Суперлигата, совладувајќи ја Струга со убедливи 45-24 во Битола. Иако стартот на натпреварот донесе интересна борба и израмнет резултат, шампионот веќе кон крајот на првиот дел успеа да воспостави контрола и на полувреме замина со предност од 20-16.
Продолжението во целост им припадна на битолчани. Со цврста одбрана и брзи контри тие целосно го скршија отпорот на гостите, кои во вториот дел постигнаа само осум погодоци. Домашниот тим пак постојано ја зголемуваше разликата, за на крајот да слави со плус 21.
Најдобри стрелци за Пелистер беа Рудолф Хакберт и Петар Атанасијевиќ со по осум голови, додека кај Струга се истакна Наум Костов со седум. Оваа победа е вистинска увертира за дербито на „зелените“ со Вардар.
