Екипата на Бутел вечерва запиша триумф на гостински терен против Радовиш со резултат 24:31 и така стигна до првата сезонска победа во новото првенство на ракометната Суперлига.
По елиминацијата од Европскиот куп, „бутелци“ целосно го пренасочија фокусот кон домашниот шампионат. Тренерот Горан Кузманоски во изјава за Спортска Мрежа истакна дека тимот по несреќното испаѓање имал јасна цел – враќање во победнички ритам.
„Овој натпревар дојде одма после натпреварот со Дуделанж од Европскиот куп. После несреќното испаѓање, се договоривме дека мора да се вратиме со добра игра и така да се вратиме во победнички ритам. Во првото полувреме иако дефанзивно игравме добро уште од самиот почеток, Радовиш имаше добар пристап од првата минута. Бевме свесни дека нема да биде лесно и бевме максимално концентрирани за да можеме да дојдеме до победа. Задоволен сум од пристапот, така што мораме да одиме против секоја екипа со ваков пристап. Најбитно од сѐ е да останеме во ритам и спремни против секого, само така ќе можеме да одиграме победнички“, рече тренерот на Бутел, Горан Кузманоски за Спортска Мрежа.
Во следното коло Бутел ќе има шанса за втор сезонски триумф, кога на домашен терен ќе го пречека Прилеп. Во првото коло „бутелци“ на свој терен беа поразени од шампионот Еурофарм Пелистер.
