Бутел дојде до првиот триумф во новата сезона откако вечерва во СРЦ „25 Мај“ го доби Радовиш во меч од 2. коло на ракометната Суперлига со резултат од 24:31. Радовишани имаа сили да парираат до 40-тата минута од мечот, кога потоа скопскиот тим одлепи и постојатно имаше плус пет предност.
Радовиш прв го отвори резултатот во СРЦ „25 Мај“ по две минути игра преку Васе Петров, но веднаш потоа Бутел влезе во ритам и направи серија од четири погодоци за водство од 1:4. Радовиш се обиде да се врати, но потоа скопскиот тим направи нова разлика на 3:7, па во 14. минута од натпреварот предводникот на домашниот тим, Александар Долдуров, побара тајм-аут.
Радовиш намали на 6:8, но одново Бутел одлелепи на нови три при 6:9 со што гостинот од Скопје не дозволуваше да дојде до ситуација да домаќинот превзема контрола над резултатот.
Голманот на Радовиш, Славјан Паунов, е вистински пантер- со неверојатна одбрана во првиот дел од натпреварот покажа дека им пркоси на годините.
Во 25. минута Радовиш дојде до 9:10 пред се благодарение на одлични интервенции на голманот Паунов, па поради тоа Горан Кузмано0ски бараш тајм-аут.
До крајот на првиот дел Бутел ја одржуваше предноста од два до три погодоци, а на пауза гостинскиот тим замина со предност од 11:14.
Во вториот дел се обиде да парира Радовиш, но Бутел не дозволи противникот резултатски да се доближи и постојатно ја билдаше разликата за мирна завршница од мечот. Разликата постојано се зголемуваше до конечни 24:31.
Радовиш го доживеа вториот пораз, а во следното коло го очекува тешко гостување кај Пролет, додека пак Бутел кој дојде до првите бодови во новата сезона во следното коло ќе игра против Прилеп.
