По ремито на тешкото гостување кај Алкалоид и убедливата победа во дербито со Струга, ракометарите на Охрид ги очекува нов предизвик — дуел против Вардар во рамки на третото коло од Супер лигата.
Тимот од Охрид во СЦ „Борис Трајковски“ ќе се соочи со составот на Вардар, кој иако е во фаза на подмладување, останува сериозен конкурент. Од таборот на Охрид мечот го најави новото засилување- Анте Иванковиќ, хрватскиот бек и МВП на турнирите во Струга и Охрид, и посочи дека тимот патува во Скопје максимално подготвен:
„Во Скопје како и против Алкалоид доаѓаме мотивирани. Вардар е добра екипа со физички силни играчи. Имаме доста време за работа, подготовки и анализа на противникот. Очекувам тврд и машки натпревар, со силна одбрана на двете страни. Покажавме дека знаеме да играме со квалитетни противници, не очекувам ништо помалку ни сега и ќе продолжиме така на секој меч“, вели Иванковиќ.
Средбата меѓу Вардар и Охрид ќе се одигра во сабота, на 20 септември, со почеток во 18:00 часот, во спортскиот центар „Борис Трајковски“ во Скопје.
